विजेतालाई २१ लाख १ रुपैयाँ र उपविजेतालाई १० लाख १ रुपैयाँ पुरस्कारको व्यवस्था
धनगढी, ५ पुस । सुदूरपश्चिम खप्तड गोल्डकप प्रतियोगिता पुष २४ गतेदेखि धनगढीमा शुरु हुने भएको छ । सुदूरपश्चिम स्पोर्टस् क्लबले बिहीबार पत्रकार सम्मेलनको आयोजना गरी गोल्डकप प्रतियोगिता बारे जानकारी दिएको हो ।
धनगढी रंगशालामा आयोजना हुने प्रतियोगितामा ए–डिभिजन, मोफसल र अन्तर्राष्ट्रिय गरी ११ टिमको सहभागिता हुने आयोजकले जनाएको छ । राष्ट्रिय स्तरमा खेलाडी उत्पादन गर्ने र सुदूरपश्चिम क्षेत्रमा फुटबलको क्रेज वढाउन यो प्रतियोगिता आयोजना गरिएको स्पोर्टस् क्लवका महासचिव प्रकाश शाहीले बताए । प्रतियोगितामा विजेतालाई २१ लाख १ रुपैयाँ र उपविजेतालाई १० लाख १ रुपैयाँ पुरस्कारको व्यवस्था गरिएको छ ।
