काठमाडाैं, १८ मंसिर । विभागीय टिम नेपाल पुलिस क्लबलाई २ – १ गोल अन्तरले पराजित गर्दै सिएमजी संकटा क्लब सहिद स्मारक ए डिभिजन लिग फुटबलको दोस्रो स्थानमा उक्लिएको छ । एन्फा कम्प्लेक्स सातदोबाटोमा भएको प्रतिस्पर्धात्मक खेलमा संकटालाई जित दिलाउन सरोज दाहाल र दिपेश आले मगरले एक एक गोल गरे । पुलिसका रबी पासवानले एक गोल फर्काए ।
खेलको २९ औं मिनेटमा सरोजले हेड गोल गर्दै संकटालाई अग्रता दिलाए । खेलको ३७ औं मिनेटमा दिपेशले गोल गरेपछि संकटाले २ – ० को अग्रता बनायो । त्यसपछि खेलको ३९ औं मिनेटमा रवीले एक गोल फर्काएपनि पुलिस २ – १ ले पराजित भयो ।
जितसंगै दोस्रो स्थानमा उक्लिएको संकटाले ६ खेलबाट १५ अंक जोडेको छ । संकटाको यो पाँचौ जित हो । जितपछि संकटाले शीर्ष स्थानको सिग्नेचर मनाङ मर्स्याङ्दीसंग पनि अंक बराबर गरेको छ । पराजित पुलिस १० अंक जोडेर लिगको पाँचौ स्थानमा छ । पुलिसको यो दोस्रो हार हो ।
