काठमाडौं, १३ कात्तिक । नेपाल वैदेशिक रोजगार व्यवसायी संघले नेपाली कामदारलाई निःशुल्क मलेसिया पठाउने नेपाल–मलेसिया सरकारबीचको समझदारीप्रति असन्तुष्टि जनाएको छ ।
नेपाल वैदेशिक रोजगार व्यवसायी संघका अध्यक्ष रोहन गुरुङले दुई देशबीच नेपाली कामदारलाई पठाउने विषयमा सोमबार गरिएको समझदारीप्रति असन्तुष्टि व्यक्त गरेका छन् ।
मंगलबार काठमाडौंमा आयोजित एक कार्यक्रममा बोल्दै उनले आफूहरुलाई जानकारी समेत नदिई सरकारले गरेको सो समझदारी आपत्तिजनक रहेको भन्दै आक्रोश व्यक्त गरे ।
अध्यक्ष गुरुङले नेपाली कामदारलाई मलेसिया पठाएवापतको सेवा शुल्क दिने व्यवस्था तत्काल नगरे नेपाली कामदारलाई मलेसिया जानबाट रोक लगाउने चेतावनी दिए । उनले नेपाली कामदारलाई मलेसिया पठाएवापतको सेवा शुल्क उपलब्ध गराउने कि नगराउने भनि सरकारलाई प्रश्न गरे।
सोमबार नेपालका श्रम, रोजगार तथा सामाजिक सुरक्षामन्त्री गोकर्ण विष्ट र मलेसियाका मानव संशोधनमन्त्री एम कुला शेघरानबीच नेपाली कामदार लैजाने विषयमा महत्वपूर्ण श्रम सम्झौतामा हस्ताक्षर गरेका थिए ।
नेपाली कामदार मलेसिया जाँदा हवाई टिकट, भिसा, स्वास्थ्य परीक्षण, सुरक्षा जाँच वापतका खर्च नेपाली कामदारले व्यहोर्न नपर्ने सहितको सो समझदारीप्रति व्यवसायीको भने असन्तुष्टि छ ।
उनीहरुले आफूहरुको सेवावापतको शुल्कको व्यवस्था नगरे सरकार विरुद्ध कडा कदम चाल्न बाध्य हुने चेतावनी पनि दिएका छन् ।
