एजेन्सी, २६ भदौ । युइएफए नेशन्स लिगमा गएराती भएको खेलमा टर्किले स्विडेनलाई तीन दुई गोल अन्तरले पराजित गरेको छ । खेलको सुरुवातमा दुई गोलले पछि परेको टर्किले उत्कृष्ट कमब्याक गर्दै जित हासिल गरेको हो ।
निकै प्रतिस्पर्धात्मक बनेको खेलको ३४ औं मिनेटमा थेलीनले गोल गर्दै स्विडेनलाई अग्रता दिलाएका थिए । पहिलो हाफमा एक गोलको अग्रता लिएको स्विडेनले ४९ औ मिनेटमा क्लासोनको गोल मार्फत अन्तर दुई शुन्यमा पुर्याएको थियो ।
दुई गोलले पछि परेको टर्किले ५१ औं मिनेटमा काल्हानोग्लुको गोल मार्फत अन्तर दुई एकमा झारेको थियो । त्यसपछि खेलको ८८ औं मिनेटमा र इन्जुरी समयको दोस्रो मिनेटमा काबाबाले लगातार दुई गोल गरेपछि टर्किले स्विडेनलाई हराउन सफल भएको हो ।
