प्रतिक्षा शर्मा
काठमाडौं, २६ जेठ । नवौं चरणको कोरियन भाषा परीक्षा सुरु भएको छ । बैदेशिक रोजगारीमा जाने अन्य देशको तुलनामा कम खर्च लाग्ने र परिक्षा पास गरेर भिषा लागेपछि कमाइ पनि राम्रो हुने भएकाले युवाहरु कोरिया तर्फ आर्कर्षित भएका छन । परिक्षा काठमाडौ र ललितपुरका विभिन्न विद्यालयमा आज र भोली संचालन हुने छ ।
सरकारले यसै वर्ष पाँच लाख युवालाई रोजगारी सृजना गर्ने कार्यक्रम बजेटमा ल्याएपनि त्यसको प्रभाव कोरिया जान चाहने युवाहरुमा भने देखिएको छैन । सरकारले बजेटमा पाँच लाख युवालाई रोजगारी दिने उद्घोषसहितको बजेट ल्याएको ११ औं दिनमा भएको कोरियान भाषा परिक्षामा पनि युवा सहभागिता कम हुन सकेन । मुलुकभित्र पर्याप्त अवसर नरहेको र पाएका अवसरमा पनि तलब सुविधा राम्रो नरहेको भन्दै युवाहरु कोरिया जानका लागि भाषा परीक्षामा सहभागी भएका छन् ।
यस पटकको परीक्षाका लागि ८२ हजार दुईसय ६४ जनाले आवेदन दिएका थिए । वैदेशिक रोजगार विभागको ‘इपीएस कोरिया शाखा’ले ६३ जना कोरियन अधिकारीको उपस्थितिमा भाषा परीक्षा लिनइरहेको छ । काठमाडौंका १६, ललितपुरका ८ र पोखराका ४ वटा परीक्षा केन्द्रमा भाषा परीक्षा संचालन गरिएको छ । परीक्षा आज र भोलि गरि ४ सिफ्टमा सञ्चालन हुने छ । विश्वविद्यालयको परिक्षाजस्तै परिक्षालाई मर्यादित बनाउन परिक्षा केन्द्र भित्र र बाहिर सुरक्षा कर्मी परिचालन गरिएका छन ।
कोरियाले सन् २००८ देखि भाषा परीक्षा लिएर नेपाली कामदार लान थालेको हो । यस बर्ष ८२ हजार मध्ये उत्पादनतर्फ चार हजार र कृषि तर्फ छ हजार दुईसय उतृर्णले कोरियामा रोजगारीको अवसर पाउने छन् । भाषा परीक्षा पास गरेर हालसम्म करिब ५० हजार नेपाली युवा रोजगारीका लागि कोरिया पुगेका छन् । कोरियामा नेपाली कामदारले औषतमा मासिक दुईलाख नेपाली रुपैयाँ कमाउने गरेका छन् ।
कोरिया भाषा परिक्षाका सहभागी जस्तै सरकारले ल्याएको रोजगारीको नाराले नछोएका अन्य युवाहरु पनि विदेश जानेबारे सोचिरहेका छन् । तिब्र विकासको योजना बनाइरहेको सरकारले त्यस्ता युवाहरुलाई स्वदेशमै आसा जगाउन विशेष कार्यक्रम ल्याउन जरुरी छ ।
