काठमाडौं, १६ जेठ । प्रमुख प्रतिपक्ष दल नेपाली काँग्रेसका नेता एवम् पूर्व अर्थमन्त्री डा. रामशरण महतले सरकारले मुलुकलाई समृद्ध बनाउने लक्ष्य अनुसारको बजेट नल्याएको दावी गरेका छन् ।
नेता महतले बजेटमा लगानी भित्र्याउन, कर्मचारीको क्षमता विकास गर्न आवश्यक कार्यक्रम नै नसमेटिएको बताए । बुधबार काठमाडौंमा आयोजित साक्षात्कार कार्यक्रममा बोल्दै उनले पाँच वर्षमा मुलुकको आय दोब्बर वृद्धि गर्ने सरकारको लक्ष्य निजी क्षेत्रलाई कर भार थपेर मात्रै नहुने भन्दै सरकारको बजेटको आलोचना गरे ।
नेता महतले बाह्य लगानी भित्र्याउने कार्यक्रम पनि बजेटमा नआएको उल्लेख गरे । उनले संघीयताको मर्म अनुसार पनि बजेट विनियोजना नगरिएको दावी गरे ।
