राकेश यादव
रौतहट, ८ जेठ । तराईका जिल्लामा गत साउनमा आएको बाढीले क्षति पुर्याएको पुल, बाँध सडक लगायतका संचरनाको पुनः निर्माण भएको छैन । एक बर्ष पुग्न लाग्दा पनि पुनःनिर्माण नहुँदा फेरी बाढीको जोखिम बढेको भन्दै स्थानीय त्रसित भएका छन् ।
गत साउनमा आएको बाढीले तराइका जिल्लामा धेरै भौतिक संचनामा क्षति पुगेको थियो । बाढी आएको एक बर्ष पुग्न लाग्दा पनि भौतिक संरचानको पुनःनिर्माण भएको छैन । बाढीका कारण पुल, बाँध सडक लगायतका संचरना जीर्ण अवस्थामा छन् । बाढीबाट वागमती नदीको दुवै तर्फ ९ स्थान र लालबकैया नदीको दुईतर्फी २२ स्थानमा बाँधहरु भत्किएको थियो ।
भत्किएको बाँध बनाउन कुनै पहल भएको छैन । भौतिक संचरनाको स्तरोन्नति नहुँदा रौतहट र सर्लाहीका लाखौ जनताहरु जोखिममा छन् । बर्षा सुरु भएसँगै फेरी बाढीको त्रासले स्थानीयलाई सताउन थालेको छ ।
बाँध निर्माणका लागि २० करोड भन्दा धेरै बजेट चाहिने भएकाले केन्द्रमा पत्रचार गरेपनि बजेट नआउँदा पुनः निर्माण हुन नसकेको सरोकारवालाको भनाइ छ । बाँध बनाउन भारतीय पक्षसँग छलफल भए पनि केहि स्थानमा मात्र बाँध बनाउन भारत सहमत भएको छ ।
अन्य स्थानमा पनि बाँध बनाउनको लागि भारतसँग छलफल गर्न केन्द्र सरकारलाई सरोकारवालाले आग्रह गरेका छन् । सरकारी पक्षले भने बाँध निर्माणका लागि सम्बन्धित निकायलाई निर्देशन दिएको दाबी गरेको छ ।
आफ्नो क्षेत्रमा पर्ने भागमा भारतले बाँधको निर्माण गरिसकेको छ । तर नेपालतर्फको बाँध भने निर्माण भएको छैन । फेरी बर्षा सुरु भएकाले बाढीको त्रासमा स्थानीय छन् ।त्यसैले बाढीबाट हुने क्षतिको न्यूनिकरण गर्न तत्काल बाँधको पुन निर्माण गर्नु आवश्यक छ ।
