काठमाडौं, २४ फागुन । आज १०८ औं अन्तर्राष्ट्रिय महिला दिवस । विभिन्न कार्यक्रम गरी नेपालमा पनि महिला दिवस मनाईंदै छ । प्रधानमन्त्री केपी शर्मा ओलीले महिलाले सामाजिक वा कानूनीरुपबाट भोग्नु परेका भेदभाव हटाउन सरकार गम्भीर रहेको बताएका छन ।
प्रधानमन्त्री ओलीले महिला दिवसका अवसरमा शुभकामना दिंदै सामाजिक पछौटेपन, अन्धविश्वास, कुरीति र त्यसबाट महिलाले भोग्नु परेका समस्या अन्त्यका लागि सरकारले विभिन्न प्रयास जारी राखेको बताएका छन ।
उनले शुभकामना सन्देशमार्फत विभिन्न खालका कुरीति अन्त्यका लागि सरकारले शिक्षा, सचेतना, कानूनी एवं व्यावहारिकरुपमा प्रभावकारी कदम चाल्ने प्रतिबद्धता जनाएका छन ।
प्रधानमन्त्री ओलीले संघीय संसद्मा ३३ प्रतिशतभन्दा बढी, प्रदेशसभामा ३४ प्रतिशतभन्दा बढी र स्थानीय तहमा ४० प्रतिशतभन्दा बढी महिला प्रतिनिधि निर्वाचित हुनु तथा राष्ट्रपति र उपराष्ट्रपति एवं सभामुख र उपसभामुखमध्ये एक जना महिला हुनुपर्ने संवैधानिक व्यवस्था हुनु विश्वकै लागि प्रेरणादायी भएको बताएका छन ।
