एजेन्सी, २१ फागुन । अफगानिस्तानमा सरकारी सेनाले दुई दिनसम्म चलाएको सुरक्षा कारबाहीमा ७० जनाको मृत्यु भएको छ । सेनाले गरेको सुरक्षा कारबाहीमा परी सरकार विरोधी ५० जना लडाकू तथा इस्लामिक स्टेट आइएस समूह आवद्ध २० जना लडाकूको मृत्यु भएको त्यहाँको रक्षा मन्त्रालयले जनाएको छ ।
मन्त्रालयका सहप्रवक्ता जनरल मोहम्मद रादमनिषले सुरक्षा कारबाहीमा २७ जना विद्रोही घाइते भएको जानकारी दिए । सरकारी अधिकारीहरुले उत्तरी दारजव क्षेत्रमा भएको भिडन्तमा २० जना आइएस विद्रोहीको मृत्यु भएको जनाएका छन् । सरकारी सेनाले हवाई तथा स्थलगत आक्रमण गरेर विद्रोहीलाई जाज्जन क्षेत्रबाट धपाइएको दाबी गरेको छ ।
