कञ्चनपुर, १९ फागुन । कञ्चनपुरको महाकाली अञ्चल अस्पतालमा उपचारमा आएकी एक महिलाको मृत्यु भएपछि आफन्तले अस्पतालमा तोडफोड गरेका छन् ।
चिकित्सकको लापरबाहीले भीमदत्त नगरपालिका ११ भुजेलाकी ४२ बर्षिय कलावती सार्कीको मुत्यु भएको भन्दै आफन्तले अस्पतालमा तोडफोड गरेका हुन् ।
तोडफोडबाट अस्पातलको एउटा एम्बुलेन्समा क्षति पुगेको छ भने अन्य एम्बुलेन्स सुरक्षाको लागि जिल्ला प्रशासनको कार्यालयमा लगिएको छ ।
कलावतीको पाठेघरमा समस्या भएको भन्दै गत साता अप्रेशन गरिएको थियो । उपचारकै क्रममा कलावतीको मृत्यु भएपछि आफन्तजनले क्षतिपूर्ति माग गर्दै आन्दोलन गरेका हुन् । अस्पतालले भने कलावतीको हृदयघातका कारण मृत्यु भएको दाबी गरेको छ ।
