लस एन्जलसको पोमोनामा वार्षिक ‘बबल रन’ सम्पन्न, १० हजारभन्दा बढीको सहभागिता

लस एन्जलसको पूर्वी क्षेत्रस्थित पोमोना फेयरप्लेक्समा आयोजित वार्षिक ‘बबल रन’मा १० हजारभन्दा बढी मानिसहरूले सहभागिता जनाएका छन् । रङ्गीचङ्गी साबुनका फिँज (बबल) र पारिवारिक मनोरञ्जनका साथ आयोजना गरिएको यस दौडमा सहभागीहरूले उत्साहपूर्वक भाग लिएका थिए । बबल रन एक पारिवारिक र गैर–प्रतिष्पर्धात्मक ५ किलोमिटरको दौड प्रतियोगिता हो । यसमा सहभागीहरू रङ्गीचङ्गी फिँजका बादलहरूका बीचबाट दौडिने वा हिँड्ने गर्दछन् ।
संयुक्त राज्य अमेरिकाका विभिन्न सहरहरूमा वार्षिक रूपमा आयोजना हुने यस कार्यक्रमले धावक, पैदल यात्री, बालबालिका तथा ज्येष्ठ नागरिकहरूलाई एकै ठाउँमा ल्याई मनोरञ्जन प्रदान गर्ने उद्देश्य राख्दछ ।
आयोजककाअनुसार हालसम्म अमेरिकाका ८० भन्दा बढी सहरहरूमा यो कार्यक्रम सञ्चालन भइसकेको छ । यी विभिन्न कार्यक्रमहरूमा हालसम्म १० लाखभन्दा बढी मानिसहरूले सहभागिता जनाइसकेको आयोजकले जानकारी दिएको छ ।