काठमाडौँ ।
नेपाल यातायात व्यवसायी राष्ट्रिय महासंघका अध्यक्ष पुण्यप्रसाद (सरोज) सिटौलाले सार्वजनिक यातायात क्षेत्रको सुधारका लागि प्रविधिको प्रयोग र व्यावसायिक अनुशासन अबको अनिवार्य आवश्यकता भएको बताउनुभएको छ ।
सडक र सवारी लक्षित मनसुनजन्य विपद् न्युनिकरण अभियान कार्यक्रममा बोल्दै अध्यक्ष सिटौलाले यातायात क्षेत्रलाई आधुनिक र मर्यादित बनाउन व्यवसायीहरू पछाडि फर्कने अवस्था नरहेको स्पष्ट पार्नुभएको हो । अध्यक्ष सिटौलाले सवारी साधनहरूमा जीपीएस प्रणाली, अनलाइन टिकेटिङ र क्यासलेस भुक्तानी प्रणाली तत्काल कार्यान्वयन गर्नुपर्नेमा जोड दिनुभयो । दुर्घटनाको समयमा यथार्थ विवरण पत्ता लगाउन र सडकमा हुने विवाद अन्त्य गर्न पनि प्रविधि आवश्यक रहेको उहाँको तर्क थियो। उहाँले सवारी जाँचपास र रुट पर्मिट नवीकरण गर्दा जीपीएस प्रणालीलाई अनिवार्य गर्न सरकार र ट्राफिक प्रहरीलाई आग्रह समेत गर्नुभयो । सडकमा जथाभाबी पार्किङ गर्ने र यात्रु चढाउने प्रवृत्तिले सडक व्यवस्थापनमा चुनौती थपेको भन्दै उहाँले देशभरका सवारी साधन अनिवार्य रूपमा तोकिएका बसपार्कबाटै सञ्चालन हुनुपर्ने बताउनु भयो ।
काठमाडौंको गोंगबुस्थित नयाँ बसपार्कका साथै पोखरा, इटहरी, बुटवल, धनगढी लगायतका सहरमा बनेका बसपार्कहरूलाई पूर्ण उपयोगमा ल्याउनुपर्ने उहाँको भनाइ छ । राजमार्गमा सञ्चालित होटलहरूले यात्रुलाई अस्वस्थकर खाना खुवाउने र चर्को शुल्क लिने गरेकोप्रति अध्यक्ष सिटौलाले आपत्ति जनाउनु भयो । होटलहरूको नियमित अनुगमन गरी गुणस्तरीय र स्वस्थकर खानाको सुनिश्चितता गर्न उहाँले सरकारको ध्यानाकर्षण गराउनु भयो । चालक र सहचालकलाई होटलको कमिसनको लोभमा नफसी यात्रुको स्वास्थ्य र सुविधालाई प्राथमिकता दिन उहाँले निर्देशन दिनुभयो ।
सिटौलाले मादक पदार्थ सेवन (मापसे) र लागुपदार्थ सेवन (लापसे) गरेर सवारी चलाउने चालकहरूलाई महासंघले कुनैपनि हालतमा संरक्षण नगर्ने स्पष्ट पार्नुभयो । यसका साथै, बजारमा भित्रिएका नक्कली पार्टपुर्जाहरूका कारण पनि दुर्घटना बढेको भन्दै उहाँले वर्कसपहरूको उचित मापदण्ड तोक्न र सीमा नाकाबाट भित्रिने सामग्रीको गुणस्तर जाँच गर्न सरकारसँग माग गर्नुभयो । यातायात मजदुरहरूको सामाजिक सुरक्षा र हितका लागि महासंघले विभिन्न मजदुर संगठनहरूसँग मिलेर सरकारसँग संवाद गरिरहेको जानकारी दिँदै सिटौलाले मजदुरहरूको जीवनस्तर सुधारका लागि आफूहरू प्रतिबद्ध रहेको बताउनु भयो । मौसमविद्को सूचनालाई प्राथमिकता दिएर सवारी चलाउन र विपद्को समयमा सचेत रहन पनि उहाँले सम्पूर्ण यातायातकर्मीहरूलाई आग्रह गर्नुभयो ।
