पोल्याण्डको संवैधानिक न्यायाधिकरणमा तनावः अध्यक्ष निलम्बनपछि सरकार र विपक्षीबीच टकराव चुलियो

पोल्याण्डको राजधानी वार्सास्थित संवैधानिक न्यायाधिकरण परिसर बाहिर हिंसात्मक प्रदर्शन भएको छ । न्यायालयका अध्यक्षलाई निलम्बन गरिएको घटनालाई लिएर प्रधानमन्त्री डोनाल्ड टस्क नेतृत्वको सरकार र विपक्षी दलका समर्थकहरूबीच भड्किएको द्वन्द्वमा प्रहरी र प्रदर्शनकारीबीच झडप हुँदा केही व्यक्ति घाइते भएका छन् । न्यायपालिकाको नियन्त्रणलाई लिएर महिनौँदेखि जारी विवाद शुक्रवार राति न्यायाधिकरणको वेबसाइटमार्फत अध्यक्ष र उपाध्यक्षलाई एक महिनाका लागि निलम्बन गरिएको घोषणापछि उत्कर्षमा पुगेको हो । सो घोषणा लगत्तै विवादित स्थितिमा रहेका एक नवनियुक्त न्यायाधीशले न्यायाधिकरणको नेतृत्व सम्हालेका थिए । बहालवाला नेतृत्वले यस कदमलाई ‘कू’ (अवैध सत्ता कब्जा) को संज्ञा दिँदै अस्वीकार गरेको छ । प्रदर्शनमा विपक्षी ‘ल एन्ड जस्टिस’ पार्टीका नेता जारोस्लाव काजिन्स्की र पूर्वप्रधानमन्त्री माटेउज मोराविएस्कीसहित सयौँ समर्थक सहभागी थिए । प्रदर्शनकारीहरूले वर्तमान सरकारमाथि न्यायपालिकाको स्वतन्त्रतामाथि हस्तक्षेप गरी कब्जा गर्न खोजेको आरोप लगाएका छन् । प्रहरीले न्यायाधिकरण परिसरमा प्रवेश गर्ने प्रयास गरेका तीन प्रदर्शनकारीलाई नियन्त्रणमा लिएको छ । विवादको जड संसदीय निर्वाचन प्रक्रियासँग जोडिएको छ । टस्कको सत्तारूढ गठबन्धनले यस वर्ष आठ जना न्यायाधीशहरूलाई निर्वाचित गरे पनि राष्ट्रपति कारोल नावरोकीले उनीहरूमध्ये तीन जनाको मात्र शपथ ग्रहण गराएका थिए । बाँकी पाँच जनाले संसद्मा शपथ लिए पनि राष्ट्रपति र न्यायाधिकरण नेतृत्वले उनीहरूको वैधानिकता स्वीकार गर्न अस्वीकार गर्दै आएका थिए । यसैबीच, सेनेगल भ्रमण छोट्याएर स्वदेश फर्किएका राष्ट्रपति नावरोकीले न्यायिक अधिकारीहरूसँग आकस्मिक बैठक गरेका छन् । उनले शनिवार मध्यरातपछि अदालतको भवनमा प्रवेश गरी थप परामर्श गरेका छन् । यस घटनाले पोल्याण्डमा संवैधानिक सङ्कटको अवस्था सिर्जना गरेको छ ।