नेदरल्याण्ड्समा हरेक वर्ष मे महिनाको दोस्रो सातान्त (विकेन्ड) मा मनाइने ‘राष्ट्रिय मिल दिवस’ यस वर्ष पनि उत्साहका साथ सम्पन्न भएको छ । यस अवसरमा देशभरका ऐतिहासिक वायु घट्ट (विन्डमिल) र पानी घट्ट (वाटरमिल) हरू सर्वसाधारणको अवलोकनका लागि खुला गरिएका थिए । फ्रिसल्याण्डको विशाल ‘पोल्डर’ क्षेत्रदेखि ऐतिहासिक किन्डरडाइक कम्प्लेक्ससम्मका विभिन्न स्थानमा पुगेका आगन्तुकहरूले ती संरचनाहरूको विशेष भ्रमण (गाइडेड टुर) गरेका थिए । सो क्रममा उनीहरूले नेदरल्याण्ड्सको राष्ट्रिय पहिचानसँग जोडिएका शताब्दीयौं पुराना यी संरचनाहरूको निर्माण कौशल र इतिहासबारे जानकारी प्राप्त गरे ।
मिल सञ्चालकहरूले ती प्राचीन मेसिनहरू प्रयोग गरेर अन्न पिस्ने र पानी पम्प गर्ने प्रविधिको प्रत्यक्ष प्रदर्शन समेत गरेका थिए, जसले डच नागरिकहरूको सङ्घर्ष र सिर्जनशीलताको प्रतिनिधित्व गर्दछ । सन् १९७२ बाट मनाउन सुरु गरिएको ‘राष्ट्रिय मिल दिवस’ हाल नेदरल्याण्ड्सको सबैभन्दा लोकप्रिय सांस्कृतिक उत्सवहरूमध्ये एक बनेको छ । यसले देशको सांस्कृतिक सम्पदा, इन्जिनियरिङ कुशलता र जीवन्त परम्पराको संरक्षणमा महत्वपूर्ण भुमिका खेल्दै आएको छ ।वर्तमान समयमा विश्वव्यापी रूपमा हरित ऊर्जाका लागि वायु ऊर्जाको महत्त्व बढ्दै जाँदा, यी ऐतिहासिक मिलहरूले डच जीवनशैलीमा हावाको शक्ति शताब्दीयौंदेखि जोडिँदै आएको तथ्यलाई पुनः स्मरण गराएका छन् ।
