काठमाडाैं । नेकपा (माओवादी केन्द्र) का नेता लिलामणी पोखरेलले तत्कालीन केपी शर्मा ओली नेतृत्वको सरकारको हठ र सामाजिक सञ्जालमाथिको प्रतिवन्ध जेन–जी आन्दोलनको मुख्य कारण भएको टिप्पणी गर्नुभएको छ । पार्टी केन्द्रीय कार्यालय पेरिसडाँडामा सञ्चारकर्मीहरुसँग कुरा गर्दै उहाँले यस्तो टिप्पणी गर्नुभएको हो ।
विद्यमान शासन प्रणालीभित्र बढ्दै गएको अनियमितता, भ्रष्टाचार र बेरोजगारीले युवामाझ नैराश्यता बढेकोमा सरकारको नेतृत्वमा रहनेहरु परिवारवादमा लिप्त हुँदा युवाहरु आन्दोलित भएको उहाँको भनाइ छ ।
उहाँले संवैधानिक आयोग तथा राज्यका निकायहरुमा प्रतिष्पर्धा र क्षमताका आधारमा नियुक्ति गर्नुपर्नेमा आफ्ना मान्छे भर्ती गर्ने प्रवृत्तिका कारण जनतामा व्याप्त आक्रोश रहेको बताउनुभयो । साथै जेन—जी पुस्ताको आन्दोलनमा व्यवस्थाविरोधी तथा वैदेशिक शक्तिहरुले घुसपैठ गरेको समेत उहाँले आशंका गर्नुभयो ।
उहाँले मुलुक राजनीतिक शुन्यतामा रहेको उल्लेख गर्दै पार्टी संगठनलाई बलियो बनाएर जनतामा जान पार्टी दृढ रहेको पनि बताउनुभयो ।
