६ असार, काठमाडौं । संयुक्त राष्ट्र संघले झापामा बसोबास गरिरहेका भुटानी शरणार्थीहरुको अवस्थाको बारेमा चासो व्यक्त गरेको छ ।
प्रधानमन्त्री शेरबहादुर देउवासँग शिष्टाचार भेट गरी संयुक्त राष्ट्रसंघीय शरणार्थी उच्चायुक्तको कार्यालयका नेपाल प्रतिनिधि केभीन जे एलेनले झापामा रहेका भुटानी शरणार्थीहरुको अवस्थाको बारेमा चासो व्यक्त गर्नुभएको हो । सिंहदरबारस्थित प्रधानमन्त्री तथा मन्त्रीपरिषद कार्यालयमा मंगलबार भएको शिष्टाचार भेटमा एलेनले भुटानी शरणार्थी समस्या समाधान गर्न नेपाल सरकारले प्रभावकारी कदम चालेको भन्दै प्रधानमन्त्री देउवाप्रति आभार व्यक्त गर्नुभएको थियो ।
प्रधानमन्त्री देउवाले भुटानी शरणार्थी समस्या समाधान गर्न संयुक्त राष्ट्र संघले खेल्दै आएको भूमिकाको खुलेर प्रशंशा गर्नुभयो । भेटमा नेपालको पछिल्लो राजनीतिक अवस्थाबारे पनि छलफल भएको प्रधानमन्त्री तथा मन्त्रीपरिषद कार्यालयले जनाएको छ । संयुक्त राष्ट्र संघले भुटानी शरणार्थीलाई तेस्रो मुलुकमा स्थानान्तरण गर्ने कामलाई चरणवद्ध रुपमा अघि बढाउँदै आएको छ ।
