भारत गुजरातको राजकोटस्थित गेम जोनमा आगलागी हुँदा १२ बालबालिकासहित २८ जनाको मृत्यु भएको छ । आगलागीबाट २५ जनालाई सुरक्षित रुपमा बाहिर निकालिएको छ ।
भारतीय सञ्चार माध्यमहरुका अनुसार शवहरु डढेकाले मृतकहरुको पहिचान गर्न सकिएको छैन । ती शव पहिचानका लागि डीएनए टेस्ट गराउने तयारी भएको छ ।
प्रत्यक्षदर्शीका अनुसार गर्मी बिदा र सप्ताहान्तका कारण मनोरञ्जनका लागि थुप्रै बालबालिका र उनीहरुका अभिभावक उत्त गेम जोनमा थिए । गेम जोनको केही स्थानमा मर्मत र स्तरोन्नतीको काम भइरहेको थियो । जसले गर्दा प्लाई र काठका टुक्राहरु यत्रतत्र छरिएका थिए ।
त्यही बेला एक्कासी आगो देखिएको थियो । यद्यपि आगलागीको कारण भने खुलेको छैन । गुजरातका मुख्यमन्त्री भुपेन्द्र पटेलले घटनाको अनुसन्धानकालागि विशेष अनुसन्धान टोली गठन भईसकेको बताउनु भएको छ । गेमजोनका म्यानेजरसहित दुई जनालाई प्रहरीले पक्राउ गरेको छ ।
त्यहाँ आगो निभाउने उपकरण पनि नराखिएकाले ठूलो क्षति भएको प्रहरीले जनाएको छ । घटनापछि गुजरात सरकारले आगो निभाउने उपकरण नराखेका राज्यभरका सबै गेमजोन बन्द गर्न निर्देशन दिएको छ ।
राज्य सरकारले मृतकका परिवारलाई ४ लाख र घाइतेहरुलाई ५० हजार रुपैयाँको दरले राहत उपलब्ध गराउने पनि निर्णय गरेको छ । ०००