काठमाडौं,६ अर्थमन्त्री डा. प्रकाशशरण महतले पछिल्लो समय बैंकबाट बचत फिर्ता गर, यो बैंक खत्तम हुँदैछ भन्ने हौवा फैलाएर बाहिरी संकट ल्याउने प्रयास भइरहेको टिप्पणी गर्नुभएको छ ।
शनिबार राष्ट्रिय लघुवित्त सदस्य सम्मेलनमा अर्थमन्त्री महतले सरकारको तर्फबाट खबरदारी गर्दै हौवा फैलाएर वित्तीय संकट ल्याउने प्रयास भइरहेको टिप्पणी गर्नुभएको हो । उहाँले त्यस्तो प्रवृत्तिलाई कारबाही गर्न ढिलो नगर्ने स्पष्ट गर्नुभयो । समाजमा गलत सन्देश दिएर, भ्रम फैलाएर हाहाकारको अवस्था सिर्जना गरेर राजनीतिक उद्देश्य प्राप्ति हुन्छ भन्ने भ्रम नराख्न मन्त्री महतले सचेत गराउनु भयो । लघु वित्तलाई कसरी स्वस्थ्य बनाउने भन्ने विषय अहिले सबैको चासो रहेको मन्त्री महतले उल्लेख गर्नुभयो ।
पछिल्लो समय लघु वित्तमा देखिएको विचलन र समस्याबाट फाइदा उठाएर राजनीतिक उद्देश्य पूर्ति गर्ने प्रयास भइरहेको भन्दै उहाँले यो एकदमै खतरनाक प्रवृत्ति भएको टिप्पणी गर्नुभयो । लघु वित्तलाई नाफा कमाउने औजारको रुपमा उपयोग गर्नु नहुने मन्त्री महतको भनाइ छ । लघु वित्तलाई विपन्न नागरिक र महिलाको सशक्तिकरण र उत्थान गर्ने माध्यमको रुपमा अगाडि बढाउनुपनेमा उहाँले जोड दिनु भयो ।