काठमाडौं,१ माघ । इन्टरनेट सेवा प्रभावकारी नहुँदा इलामको देउमाई नगरपालिकाका सेवाग्राही मर्कामा परेका छन् । नेपाल टेलिकम, सुविसु, ब्रोडलिंकलगायतका सेवाप्रदायक कम्पनीले वितरण गरेको इन्टरनेट सेवा सुस्त भएपछि सेवाग्राही समस्यामा परेका हुन् ।
सेवाप्रदायक कम्पनीले आफूले कबुल गरेअनुसारको स्पिडमा सेवा नदिएर ठगी गरेको कतिपय सेवाग्राहीको आरोप छ । तोकिएको स्पिडमा सेवा नदिने र पटक–पटक सेवा अवरुद्ध भए पनि कम्पनीले पूरा रकम असुल्ने गरेको सेवाग्राहीको गुनासो छ ।
सेवाप्रदायक कम्पनीहरूको बेइमानीका कारण कम्प्युटर इन्स्टिच्युट, साइबर र बैंक तथा वित्तीय संस्थाहरूसमेत प्रभावित हुने गरेका छन् । सेवाग्राहीको गुनासोसँग सेवाप्रदायक कम्पनीका प्राविधिकसमेत पूर्ण सहमत देखिन्छन् ।
सेवाप्रदायक कम्पनीहरूलाई आफूले कबुल गरेअनुसार इन्टरनेट सेवा दिन सेवाग्राहीको माग छ । यससम्बन्धमा नेपाल दूरसञ्चार प्राधिकरणले समेत चासो दिनुपर्ने उनीहरूले बताएका छन् ।
