काठमाडौं । सांसदहरुले काठमाडौं उपत्यकाका मुख्य सडकहरुमा नै ढल बग्ने समस्याको व्यवस्थापन हुनुपर्ने बताएका छन् ।
मंगलवार पूर्वाधार विकास समितिको बैठकमा बोल्दै सांसदहरुले काठमाडौं उपत्यकाका मुख्य सडकहरुमा ढल व्यवस्थापनको चुनौति रहेको बताएका हुन् । उनीहरुले मुख्य सडकमा नै खोला र ढलहरु जोडिएको साना बालबालिकाहरु बगाउने समस्या सिर्जना भइरहेको बताए । साउन ७ गते काठमाडौंको रानीवनस्थित सामाखुशी खोलामा आएको बाढीले बगाउँदा बेपत्ता भएका विधान आलेमगर बेपत्ता भएको घटनालाई लिएर सांसदहरुले फेरि यस्ता घटना हुन नदिन सचेत गराए । बैठकमा बोल्दै नेपाली काँग्रेसकी सांसद प्रतिमा गौतमले भारी वर्षा हुने बित्तिकै काठमाडौंका सडकहरुमा जाम हुने, अस्तव्यस्त हुने र सडकमा नै खोला बग्ने अवस्थाको अन्त्य गर्न जरुरी रहेको बताउनु भयो ।
उहाँले भन्नुभयो, ‘भारी वर्षा हुने बित्तिकै काठमाडौंका सडकहरु जाम हुने, काठमाडौं अस्तव्यस्त हुन्छ । सडकमै खोला बग्ने अवस्था भएकाले यो समस्या आएको हो । मुलमुल सडकमै खोला बग्छ । त्यसको व्यवस्थापन गर्नु प¥यो ।’
समितिको बैठकमा बोल्दै नेकपा एमालेका सांसद ठाकुरप्रसाद गैरेले काठमाडौंका सडक छेउमा बहने नदीहरुमा तत्काल ढल गाढेर सुरक्षित गर्नुपर्ने बताउनु भयो । उहाँले काठमाडौंका यस्ता समस्याहरुको दीर्घकालीन व्यवस्थापनका बारेमा सोच्न जरुरी रहेको बताउनु भयो ।
उहाँले भन्नुभयो, ‘एक जना बालक बेपत्ता छन् । त्यहाँ फेरि पनि पानी आयो भने समस्या जस्ताको तस्तै छ । त्यसमा अहिले तत्काल ढल गाढेर अहिले तत्काल निकास दिन के गर्नुपर्छ ? र, दीर्घकालीन रुपमा समस्या समाधानका लागि तपाईहरुको कुरा के छ ? यसका लागि हामी अनुगमनमा जान पनि तयार छौं । यसको समाधानको कुरा सरकारबाट हामीले चाहेको हो ।’
समितिको बैठकमा बोल्दै जनता समाजवादी पार्टी, नेपालकी सांसद सुशीला श्रेष्ठले पानी पर्नु भन्दाअघि एक पटक ढलको मंगालहरु सफा गर्नुपर्ने अभियान चलाउन आवश्यक रहेको बताउनु भयो । उहाँले सडक निर्माणमा दीर्घकालीन योजना बन्न नसकेको बताउनु भयो ।
उहाँले भन्नुभयो, ‘पानी पर्नु भन्दाअघि एक पटक ढलको मंगालहरु सफा गर्नुपर्छ । यो अभियान चलाउनुपर्छ । बाटो भन्दा तल बनेको घरमा पानीहरु पस्ने भएकाले त्यसको समाधान गर्नुपर्छ । सडक निर्माणमा दीर्घकालीन योजना नबनेको हो की भन्ने जस्तो लाग्छ । किनभने एकछिनमै बनायो, एकछिनमै भत्कायो छ, विदेशतिर बनिसकेपछि त्यसरी फेरि फेरि भत्काउने काम गरिँदैन । हाम्रोमा धेरै भत्किने नबनिने छ, ढलको समस्या ठूलो छ, भत्काउने नबनाउने, त्यसैले काम गरिसकेपछि त्यसलाई व्यवस्थित गर्नुपर्छ ।’
समितिको बैठकमा बोल्दै नेपाली काँग्रेसका सांसद ऐनबहादुर शाही ठकुरीले सामाखुशीको बाढीमा परी बेपत्ता भएका बालकको खोजि कार्य तिब्र बनाउनुपर्ने बताउनु भयो । उहाँले आगामी दिनमा यस किसिमका घटना हुन नदिन विपद्पूर्व तयारी गर्नुपर्ने बताउनु भयो ।
उहाँले भन्नुभयो, ‘सामाखुशीमा केही दिनअघि मात्रै विधान आलेमगर बेपत्ता हुनुभयो, त्यसका लागि आज ९ दिन भइसक्दासमेत उहाँको अवस्था जानकारी भइरहेको छैन, यसलाई अझै खोजि कार्य बढाउनुपर्छ । अब यस्ता घटना नदोहोरिउन्, यस्तो बेलामा सबै विपद्पूर्व तयारी होस् ।’
सांसद ठकुरीले काठमाडौंको ढल व्यवस्थापनमा विशेष जोड दिनुपर्ने बताउनु भयो ।
