एजेन्सी, ८ साउन । करण जोहरको फिल्म रकी र रानीको प्रेमकथा जुलाई २८ मा हलमा रिलिज हुँदैछ । फिल्मले रिलिज अगावै बजेटको ९० प्रतिशत रिकभर गरिसकेको छ । रिपोर्टलाई विश्वास गर्ने हो भने १६० करोडको बजेटमा बनेको यो फिल्मको प्रिन्ट र पब्लिसिटीमा १८ करोड रुपैयाँ खर्च भएको छ । फिल्मको कुल लागत १७८ करोड भारु हुन्छ ।
फिल्मले अहिलेसम्म डिजिटल राइट्सबाट ८० करोड र स्याटेलाइट राइट्सबाट ५० करोड कमाएको छ । यसबाहेक निर्माताले यसको संगीत अधिकार ३० करोडमा बेचेका छन् । यी सबै सहित अहिलेसम्म १६० करोड रुपैयाँ असुली भइसकेको छ । यसरी हेर्दा रकी र रानीको प्रेमकथा बक्स अफिसमा सुरक्षित अवस्थामा छ ।
निर्माण पक्षले फिल्मको अहिलेसम्म ‘तुम के मिली’, ‘झुम्का’ र ‘वे कमलिया’ गरी तीनवटा गीत सार्वजनिक गरिसकेको छ । सोमबार निर्माण पक्षले यसको चौथो गीत ‘धिण्डोरा बाजे रे’ रिलिज गर्दैछ । दुर्गा पूजाको पृष्ठभूमिमा गीतलाई रणवीर र आलियामा खिचिएको छ ।
२ घण्टा ४८ मिनेटको यो चलचित्रलाई सेन्सर बोर्डले यू÷ए प्रमाणपत्र पनि दिएको छ । बोर्डले गालीमा कटौतीसँगै केही शब्दमा परिवर्तन गर्दै कुल ५ परिवर्तन गरेको छ ।
लोकप्रिय रम ब्रान्ड ओल्ड मोङ्कलाई बोल्ड मोङ्कले प्रतिस्थापन गरेको छ।
फिल्मबाट तीनवटा संवाद पूर्ण रूपमा हटाइएको छ । यसमा लोकसभा र पश्चिम बंगालकी मुख्यमन्त्री ममता बनर्जीलाई सन्दर्भ दिइएको छ। अधोवस्त्र पसल दृश्यबाट एक संवाद पनि हटाइयो। यो एक ’अभद्र’ र ’महिलाहरूको लागि अपमानजनक’ संवाद थियो। ट्रेलरमा देखाइएको गुरु रविन्द्रनाथ टैगोरको दृश्य पनि सम्पादन गरिएको छ ।
