काठमाडौं, ४ साउ । त्रिभुवन अन्तर्राष्ट्रिय विमानस्थलबाट बुधबार बरामद भएको सुनको परिमाण आज यकिन गर्ने भएको छ । बुधबार १०० किलोको बीचमा रहेको अनुमान गरेपनि आज भने यकिन परिणामबारे सार्वजनिक गर्ने राजस्व अनुसन्धान विभागले जनाएको छ ।
विभागको टोलीले उक्त परिणाममा सुन बरामद गरेको हो । सुन चीनबाट ल्याइएको मोटरसाइकलको ब्रेकप्याडमा १६० सेटमा लुकाइएको अवस्थामा भेटिएको राजस्व अनुसन्धान विभागले जनाएको छ । यस प्रकरणमा शंकास्पद केही व्यक्तिलाई नियन्त्रणमा लिइएको जनाइएको छ ।
सुन ओसारपसारमा संलग्न रहेका ट्याक्सी चालकसहित ६ जना पक्राउ परेका छन् । दिलिप भुजेल, रामकुमार भुजेल, भन्सार एजेन्ट राजेन्द्र राई ट्याक्सी चालक र थप दुई जनासमेत गए राति नै पक्राउ परेका हुन् । भन्सार छलेर तस्करी भएको सूचनाको आधारमा विभागले आकस्मिक छापा मारेको थियो ।
