काठमाडौं । पेरिस ओलम्पिक महिला फुटबल एसिया छनोटको पहिलो चरणको पहिलो खेलमा नेपाल भियतनामसँग पराजित भएको छ ।
त्रिपुरेश्वरस्थित दशरथ रंगशालामा भएको खेलमा नेपाल भियतनामसँग ५–१ गोल अन्तरले पराजित भएको हो । खेलको ११औं मिनेटमा फाम हाइ यनले गोल गर्दै भियतनामलाई सुरुआती अग्रता दिलाएकी थिइन् । साथै, खेलको ३६औं मिनेटमा कप्तान हुन्ह न्हुले पेनाल्टीमार्फत गोल गर्दै भियतनामलाई दुई गोलको अग्रता दिलाएकी थिइन् ।
खेलको ३८औं मिनेटमा एनगुएन थि बिच थुएले गोल गर्दै पहिलो हाफमा भियतनामलाई तीन गोलले अघि बढाएकी थिइन् । दोस्रो हाफको दुई मिनेटमै कप्तान न्हुले हेडर मार्फत व्यक्तिगत दोस्रो गोल गरिन ।
खेलको ७८औं मिनेटमा नेपालको तर्फबाट साबित्रा भण्डारीले गोल गर्दै खेललाई ४–१ को अवस्थामा ल्याएकी थिइन् । तर, खेलको अन्तीम समयमा भियतनामले एक गोल थप्दै नेपालविरुद्ध फराकिलो जित निकाल्न सफल भएको हो ।
