एजेन्सी, १४ माघ । के तपाईले केही हजार मात्र गुमाउनुभयो भने के हुन्छ ? त्यसमाथि व्यापारमा थोरैमात्र हुने घाटाले व्यवसायीलाई निकै पीडामा पार्छ । तर, एशियाका सबैभन्दा धनाढ्य गौतम अडानीले तीन दिनमा ६५ खर्ब नेपाली रुपैयाँ बराबरको सम्पत्ति गुमाइसकेका छन् ।
अडानीले एक्कासी सम्पत्ति गुमाउनुको कारण हो एउटा रिसर्च जसले उनको व्यवसायिक जालसाझी र शेयरमा अनियमितताको तथ्यदाबी प्रस्तुत गरेको छ । रिसर्च गर्ने हिन्डेनवर्ग रिसर्च फर्म अमेरिकामा मुकाम रहेको संस्था हो । जसको एक सय पृष्ठको प्रतिवेदन अडानी ग्रुपको जालसाझी र शेयरमा अनियमितताको विषयले भरिएको छ । अडानी ग्रुपले यसलाई अस्वीकार गरेको छ ।
रिसर्च प्रतिवेदनपछि अडानको शेयरको मूल्य ह्वात्तै झर्न पुग्यो । शेयर लगानीकर्ताहरुले पनि ठूलो रकम गुमाए । यो क्रम तीन दिनयता चलिनै रह्यो ।
भारतका प्रधानमन्त्री नरेन्द्र मोदीनिकट मानिएका गुजरातका व्यापारी अडानी पछिल्लो समय निकै चर्चामा आए । उनले एक टेलिभिजन कार्यक्रममा आफूले गरेको मिहेनतबारे समेत वर्णन गरेका छन् । अडानीको ऊर्जा, मिडियालगायतका क्षेत्रमा ठूलो लगानी छ । उनको सिमेन्टलगायतका उत्पादन गर्ने कम्पनी पनि छन् ।
सन् २०२२ मा अडानीको सम्पत्ति ५५ अर्ब डलर बढेको थियो । गत वर्ष सबैभन्दा बढी नाफा कमाउने अर्बपतिमा अडानी नै परेका थिए । तर, उनले उक्त नाफा तीन दिनमा गुमाइसकेका छन् ।
