काठमाडौं । सरकारले आजदेखि काठमाडौं उपत्यकामा २० वर्ष पुराना भाडाका गाडी चलेको भेटिए कारवाही गर्ने भएको छ ।
वातावरण प्रदुषण गरेको, ट्राफिक व्यवस्थापनमा समस्या थपेको तथा सडक दुर्घटनाको मुख्य कारण पुराना गाडी भएकाले विस्थापित गर्न लागिएको यातायात व्यवस्था विभागले जनाएको छ ।
मंगलबारसम्म पुराना गाडीको कर तिरेर कवाडी बनाउन सर्वसाधारण नागरिकलाई सचेत गराइएकाले आजदेखि पुराना गाडी चलाएको भेटिए विभागले जफत गरेर गाडी धनीलाई कारवाही पनि गर्ने जनाएको छ ।
विभागका प्रवक्ता डाक्टर टोकराज पाण्डेका अनुसार बिहीबारदेखि पुराना गाडीको नवीकरण, रुट इजाजत, दर्ता र कर उठाउने प्रक्रिया बन्द गरिने छ ।
पहिलो चरणमा उपत्यकामा रहेका झण्डै २५ सय देखि ३ हजार वटा २० वर्षे पुराना गाडी हटाउन लागिएको विभागका सवारी तथा सवारी चालक नियमन शाखाका अधिकृत अर्जुन रिजालले बताउनुभयो ।
उहाँका अनुसार उपत्यकाका पुराना गाडी हटाएपछि अर्को वर्षको फागुन मसान्तसम्ममा देशभरीबाटै पुराना गाडी हटाइनेछ । यस्तै भाडाका गाडी हटाएपछि विस्तारै निजी र पर्यटक चढ्ने पुराना गाडी पनि हटाइने उहाँले बताउनुभयो ।
भौतिक पूर्वाधार तथा यातायात मन्त्रालयले पुराना गाडी हटाउने जिम्मा यातायात व्यवस्था विभागलाई दिएको हो ।
