काठमाडौं । बंगलादेशमा जारी शेख कमल अन्तर्राष्ट्रिय क्लब कप फुटबलको सेमिफाइनलमा मनाङ मस्र्याङ्दी क्लब माल्दिभ्सको टिसी स्पोर्टस क्लबसँग १–० गोल अन्तरले पराजित भएको छ ।
८२ औँ मिनेटमा टिसी स्पोर्टसका नाफ्लु अलिले गरेको गोल नै निर्णायक बन्दा मनाङ पराजित भयो । मनाङका गोलकिपरले गरेको बल पन्च नाफ्लुको छातीमा लागेर गोल भएको थियो ।
खेलमा मनाङ र टिसी स्पोर्टस दुबैको फिनिसिङ निकै फितलो देखिएको थियो । मनाङले गरेको केही राम्रा प्रहार भने टिसी स्पार्टसका गोलरक्षक किरण चेम्जोङले विफल पारे । टिसी स्पोर्टसको गोलपोष्ट नेपाली राष्ट्रिय टिमका गोलरक्षक किरण चेम्जोङले सम्हालेका हुन् ।
किरण खेलको म्यान अफ द म्याच भए । मनाङ लिग चरणमा एक खेलमा जित, एकमा बराबरी र एक खेलमा हार ब्यहोरे पनि हेड टू हेडका आधारमा समूह ‘बी’ उपविजेता बन्दै प्रतियोगिताको सेमिफाइनल आएको थियो ।
टिसी स्पोर्टस समूह ‘ए’ को विजेताका रुपमा अन्तिम चारमा पुगेको हो । प्रतियोगिताका विजेताले ३० हजार अमेरिकी डलर र उपविजेताले १५ हजार अमेरिकी डलर पुरस्कार पाउने छन् ।
