भक्तपुर। मुनि विहार (श्री धर्म्मोत्तम महाविहार) इनाचो भक्तपुरमा थाइल्याण्डका १९औँ राजगुरूको संरक्षणमा सामूहिक प्रब्रज्या तथा उपसम्पदा भएको छ । प्रमुख धर्मगुरु संघनायक भिक्षु बोधिसेन महास्थिवर तथा उपप्रमुख भिक्षु विपस्सी महास्थिवरको समुपस्थितिमा कार्यक्रम भएको हो । कार्यक्रममा वयस्कद्वय गोविन्द अधिकारी तथा रामानन्द अहिरलाई उपसम्पदा दिक्षा अर्थात पूर्ण भिक्षु दिक्षा प्रदान गरियो । कार्यक्रममा अरू २० किशोरलाई पनि श्रामणेर प्रब्रज्या प्रदान गरियो । जसमध्ये निकट भविष्यमा १७ जना थइल्याण्डमा बुद्धधर्मको उच्च शिक्षा हासिल गर्न जानमा छानिएका हुन् ।
हाल यस मुनि विहारमा ८० जना प्रब्रजितहरूलाई जीवनयापन(आवास, भोजन, वस्त्र, उपचार) निःशुल्क प्रदान गरिरहेको छ । यस विहारमा भक्तजनहरूले स्वेच्छाले प्रायः दिनहुँ दानपुण्य भइरहेकाे छ । भक्तजनको दीर्घायु, सुस्वास्थ्य तथा उत्तरोत्तर प्रगतिको कामना गर्दै पूजापाठ गरिन्छ। 
