प्रतिक्षा शर्मा,काठमाडौं
काठमाडौं—निजगढ द्रुतमार्ग सुझाव समितिले नेपाल सरकार आफ्नै लगानीमा आफ्नो लगानीमा निर्माण गर्न सुझाव दिएको छ ।
सोमबार सुझाव समितिका संयोजक डा. मीनबहादुर श्रेष्ठले प्रधानमन्त्री पुष्पकमल दाहाल लार्ई प्रतिवेदन बुझाउदै नेपालकै लगानीमा निर्माण गरिनुपर्ने बताउनुभएको हो ।
गत पौष ७ गते फास्ट ट्रयाक निर्माणको सम्भाव्यता अध्ययन गरी सरकारलाई सुझाव पेश गर्न मन्त्रीपरिषदले राष्ट्रिय योजना आयोगका उपाध्यक्ष डा. मीनबहादुर श्रेष्ठको संयोजकत्वमा ७ सदस्यीय सुझाव समिति बनाएको थियो ।
प्रतिवेदन बुझाउँदै संयोजक डा. श्रेष्ठले सरकारले आफूहरुलाई दिएको कार्यदेशअनुसार प्रतिवेदन बुझाएको बताउनु भयो ।
प्रतिवेदनमा समय र खर्चको बचतका लागि पुरानो कम्पनिले बनाएको डिपीआर लिनु उपर्युक्त हुने, फास्ट ट्रयाक नेपालको आफ्नै लगानीमा निर्माण गर्न सकिने, त्यसका लागि वार्षिक १० देखि २० अर्ब बजेटको व्यवस्था गर्न सकिने र नेपाल सरकार आफैले कार्यालय स्थापना गरेर काम सुरु गर्नु राम्रो हुने विषय समेटिएको संयोजक श्रेष्ठले जानकारी दिनुभयो ।
प्रतिवेदन बुझ्दै प्रधानमन्त्री दाहालले समितिले तोकिएको अवधिभित्र तोकेको कार्यदेश अनुसार सुझाव दिएको र सुझाव अनुसार नै काम अघि बढ्ने बताउनुभयो ।
