पाकिस्तान । पाकिस्तानको उत्तर–पश्चिमी क्षेत्रमा भएका दुई छुट्टाछुट्टै आत्मघाती बम आक्रमणमा कम्तिमा सात जनाको ज्यान गएको छ ।
घटनामा परि अन्य केही घाइते भएका छन् । मोहमन्द आदीबासी क्षेत्रमा भएको पहिलो आत्मघाती आक्रमणमा पाँच जनाको ज्यान गएको बिबिसीले जनाएको छ ।
ज्यान जानेमा तीन जना प्रहरी अधिकारी र दुई जना सर्वसाधारण नागरिक छन् ।
तालिबानसँग सम्बन्धित जमात–उस–अहरारले आक्रमणको जिम्मेवारी लिएको छ ।
यस्तै पेशावर शहरमा न्यायाधीश चढेको गाडीलाई लक्षित गरी भएको आक्रमणमा दुई जनाको ज्यान गएको छ ।
आक्रमणमा परि न्यायाधीश चढेको गाडीका चालक र एक पैदलयात्रीको ज्यान गएको हो ।
गाडीमा रहेका चार जना न्यायाधीश घाइते भएको स्थानीय अधिकारीले बताएका छन् ।
पाकिस्तानमा पछिल्लो समय आत्मघाती बम आक्रमणका घटना बढ्दै गएका छन् ।
