काठमाडौं । प्रमुख तीन दलका शीर्ष नेताहरुको बैठक सकिएको छ । प्रधानमन्त्री निवास बालुवाटारमा बसेको बैठकमा स्वतन्त्र विद्यार्थी युनियनको निर्वाचन तोकिएकै मितिमा गर्न शीर्ष नेताहरु सहमत भएका छन् ।
बैठकपछि नेताहरुले स्ववियु चुनाव तोकिएकै मितिमा सम्पन्न गर्नका लागि त्रिविलाई अनुरोध गर्ने र भातृ संगठनहरुलाई चुनावको तयारीमा लाग्न निर्देशन दिने सहमति बनेको हो ।
यस्तै बैठकमा मंगलबार राति अबेरसम्म भएको छलफललाई नै निरन्तरता दिइएको छ ।
मंगलबार राति तीत दलका शिर्ष नेता जारी राजनीतिक गतिरोध अन्त्य गर्न आन्दोलनरत मधेसी मोर्चा सहमितमा नआए पनि जेठ मसान्तभित्रै स्थानीय निर्वाचन गरी अघि बढ्ने निष्कर्षमा पुगेका थिए ।
सकेसम्म मधेसी मोर्चालाई मनाउने, नमाने पनि एक दुई दिनभित्रै चुनाव मिति घोषणा गर्ने निष्कर्षमा नेताहरु पुगेका छन् ।
प्रमुख दल कांग्रेस,एमाले र माओवादीबीच मंगलबार शीर्ष तहमा छलफलपछि प्रधानमन्त्री पुष्पकमल दाहाल फागुन ८ भित्रै स्थानीय चुनाव मिति घोषणा गर्ने निश्कर्षमा पुगेको बताइएको छ ।
मधेसी मोर्चासँग एकपटक अन्तिम छलफल गरी चुनाव मिति घोषणा गर्ने तयारीमा सरकार रहेको छ ।
मंगलबार बिहान राष्ट्रपति विद्या भण्डारीले प्रधानमन्त्री दाहाल र एमाले अध्यक्ष केपी ओलीलाई बोलाई निर्वाचनबारे छलफल गर्नुभएको थियो ।
राति कांग्रेस सभापति शेरबहादुर देउवा समेतको बैठक सकारात्मक बनेको हो ।
आजको बैठकबाट ठोस निश्कर्ष नआए पनि निर्वाचनको वातावरण बन्दै गएको प्रधानमन्त्री सचिवालयले जनाएको छ ।