Our Network

माघ १० २०७८, सोमबार

यलम्बरको सय फिट अग्लो शालिकसहित पार्कको शिलान्यास

खोटाङ । खोटाङको दिक्तेल रुपाकोट मझुवागढी नगरपालिका–१४ बुईपामा प्रथम किराती राजा यलम्बर हाङको सय फिट अग्लो शालिक शिलान्यास गरिएको छ । 
आन्तरिक पर्यटन प्रवद्र्धनका लागि दिक्तेल रुपाकोट मझुवागढी नगरपालिकाको ३० प्रतिशत र १ नम्बर प्रदेश सरकारको ७० प्रतिश गरी १४ कराेड रुपैयाँको लागत सहभागितामा पूरा गर्नेगरी बुईपाको पञ्चरदोबाटोमा प्रथम किराती राजा यलम्बर हाङको शालिक तथा यलम्बार पार्क शिलान्यास गरिएको हो ।

नछुङ धनीराम नछुङले मुन्धुमी विधिअनुसार माङी गरेपछि दिक्तेल रुपाकोट मझुवागढी नगरपालिकाका मेयर दिपनारायण रिजाल र उपमेयर विणादेवी राईले प्रथम किराती राजा यलम्बर हाङको शालिक तथा यलम्बार पार्क शिलान्यास गरेका हुन् । 

दिक्तेल र उदयपुरको गाईघाट जोड्ने महुरे–फोक्सिङटार सडकले छोएको पञ्चरदोबाटोमा रहेको करिब ३० रोपनी सार्वजनिक जग्गाभित्र चोभारको मञ्जुश्रीपार्कको शैलीमा यलम्बर हाङको शालिक तथा यलम्बर पार्क निर्माण सुरु गरिएको हो ।

प्रवेश शुल्कबापत संकलन हुने रकमको ६० प्रतिशत नगरपालिका र ४० प्रतिशत रकम प्रदेश सरकारको कोषमा जम्मा हुने गरी यलम्बर हाङको शालिक तथा यलम्बार पार्क निर्माणको काम अघि बढाइएको हो । 

करिब सय वर्ष टिक्ने फाइबरको यलम्बर शालिक पिलरसहित सय फिट अग्लो हुने बुईपाका वडाध्यक्ष दिनेश राईले बताए । बुईपाको पञ्चरदोबाटोमा पार्कसहितको यलम्बर हाङको शालिक राख्नका लागि असोज २०७५मा सर्भे गरिएको थियो । 

यलम्बर हाङको शालिक तथा यलम्बर पार्क निर्माणको ठेक्का उमा–तुवाचुङ–अनसुवी जेभीले लिएको छ । आगामी १८ महिनाभित्र यलम्बार पार्क तथा यलम्बरको शालिक राख्ने काम पूरा हुने मेयर रिजालले बताए । यलम्बर हाङको शालिक तथा यलम्बार पार्क निर्माणका क्रममा हालसम्म एक करोड ५० लाख खर्च भइसकेको छ । 

२०७६ सालदेखि यलम्बर पार्कको काम थालेको निर्माण कम्पनीले असार २०७८ मा यलम्बरको शालिक निर्माणका लागि सम्झौता गरेको हो । यलम्बरको मूर्ति निर्माणका लागि किरात राई यायोक्खाले २०७६ असोजमा दिक्तेल रुपाकोट मझुवागढी नगरपालिकालाई स्केच प्रदान गरेको थियो ।

पार्क तथा शालिकका लागि २०६७ मा पहिलो डीपीआर तयार पारिएको थियो । तर, पहिलो डीपीआरमा भएको अपुरो पक्षलाई सुधार गर्दै २०७७ मा अर्को कन्सल्टेन्सीमार्फत दोश्रो डीपीआर बनाउनु परेको मेयर रिजालले बताए । 

पार्क अन्तर्गत हालसम्म गेट, बाटो, कफिसप, रेस्टुरेन्टलगायतका संरचना बनिसकेको छ । लागत सहभागितामा यलम्बर हाङको शालिक तथा यलम्बार पार्क निर्माणका लागि नगरपालिका र प्रदेश सरकारबीच जेठ २०७६ मा सम्झौता गरिएको थियो । 

यलम्बर पार्कमा घुमफिर गर्ने ठाउँ, विश्राम गर्ने फलामे कुर्सी, फ्री–वाइफाइ, कफी तथा फास्टफुड लगायतका आधुनिक सेवासुविधासहितको संरचना निर्माण गर्ने डीपीआरमा उल्लेख छ । यलम्बरको शालिक रहने यलम्बर पार्क प्रवेश गर्न शुल्क निर्धारण गरिने उपभोक्ता समितिका अध्यक्ष मिलन राईले बताए । 

Leave a Reply