बैतडी । बर्षा रोकिएसँगै बैतडीको सिगास गाउँपालिका–५ को ढुंगाडमा फसेका व्यक्तिहरू वारपार गर्न सक्ने भएका छन् । आइतबार रातीदेखिको बर्षाले ढुंगाडको टापुमा फसेका व्यक्तिहरू नदीको बहाव कम भएपछि वारपार गर्न थालेको वडाअध्यक्ष रामबहादुर धामीले बताए ।
सेती नदीको चारैतिरबाट आएको भंगालो केही कम भएसँगै स्थानीयबासी ज्यान जोगाउन टापु छोडेर निस्कन थालेका छन् । तर उनीहरूमा के खाने ? कहाँ बस्ने ? भन्ने चिन्ताले सताउँन थालेको छ ।
बाढीले ढुंगाडका पाँच घर बगाएको छ । अन्य घरमा पानी पसेर अन्नपात नष्ट भएका छन् । यहाँ एक सय ५० बिगाह जमीन बगरमा परिणत भएको उनले बताए । स्थानीयको बिचल्ली भए पनि सरकारले उनीहरूको उद्धार तथा राहतका कुनै कदम नचालेको उनको गुनासो छ । धामीले भने, ‘हिजो टापुमा फसेका व्यक्तिहरूको उद्धारका लागि प्रदेश सरकार र केन्द्र सरकारलाई अनुरोध गर्दा कुनै पहल भएन् ।’ काठमाडौंमै रहेका सिगास गाउँपालिका अध्यक्ष हरिसिंह धामीले प्रधानमन्त्री शेरबहादुर देउवालाई भेटेरै उद्धारका लागी अनुरोध गरेका थिए । धनगढीमा रहेको गाउँपालिकाका प्रवक्ता तथा वडा नम्बर ५ का वडाअध्यक्ष रामबहादुर धामीले मन्त्रालयमै गएर अनुरोध गर्दा समेत प्रदेश सरकारले कुनै पहल नगरेको उनले बताए ।
ढुंगाडबासी बर्षा कम भएसँगै ज्यान जोगाउन सफल भए पनि खान बस्न समस्या भएको स्थानीय शिक्षक मिनबहादुर चन्दले बताए । स्थानीयबासीको पाँकिसकेको र पाक्नै लागेको धान, कोदो र बदाम लगाएको खेत बगरमा परिणत भएको छ ।
