काठमाडौं । सरकारले संघीय संसदको चालू अधिवेशन सोमबार राति १२ बजेदेखि अन्त्य गरेको छ । राष्ट्रपति विद्यादेवी भण्डारीले संघीय संसदको दुवै सदनको चालू अधिवेशन सोमबार राति १२ बजेबाट अन्त्य हुने व्यहोराको पत्र सभामुख अग्नीप्रसाद सापकोटाले पढेर सुनाएका हुन् ।
सोमबार बसेको प्रतिनिधिसभा बैठकमा सभामुख सापकोटाले राष्ट्रपति भण्डारीले प्रतिनिधिसभामा पठाएका पत्र वाचन गर्दै भने– ‘नेपालको संविधानको धारा ९३ को उपधारा २ बमोजिम नेपाल सरकार मन्त्रीपरिषद्को २०७८-४-३२ को सिफारिसमा संघीय संसद दुवै सदनको चालू अधिवेशन २०७८ साल साउन ३२ गते सोमबार राति १२ बजेदेखि अन्त्य गरेको छु ।’
सभामुख सापकोटाले राष्ट्रपतिको सो पत्र वाचन गरेपछि प्रतिनिधि सभाको चालू अधिवेशन सोमबार राति १२ बजेबाट स्वतः अन्त्य हुने घोषणा गरे ।सर्वोच्च अदालतले प्रतिनिधिसभा पुनस्र्थापना गरेपछि गत साउन ३ गतेबाट अधिवेशन सुरु भएको थियो । अधिवेशनबाट प्रधानमन्त्री देउवाले विश्वास मत समेत लिएका थिए ।
