एजेन्सी । कोरोना भाइरसको उद्गमस्थल मानिएको चीनको हुबेई प्रान्तको राजधानी वुहानमा सबैको परीक्षण गरिने भएको छ ।
करिब १ करोड १० लाख जनसंख्या रहेको उक्त शहरमा पछिल्लो समय कोरोना संक्रमण देखिएपछि सबैको परीक्षण गर्न लागिएको चिनियाँ संज्ञार माध्यमहरुले जनाएका छन् ।
वुहानमा पछिल्लो समय ७ जनामा संक्रमण पुष्टि भएको छ । वुहानमा अहिलेसम्मकै बढी संक्रामक मानिएको डेल्टा भेरियन्ट देखिएको बताइएको छ । करिब एक वर्षपछि वुहानमा स्थानीय स्तरमा संक्रमण पुष्टि भएको हो ।
वुहानले कोरोना महामारी नियन्त्रण तथा रोकथामका लागि विश्वमै पहिलो पटक लकडाउनको अभ्यास गरेको थियो । चीनमा पछिल्लो १० दिनमा ३ सय जनामा संक्रमण देखिएको छ । जुन केही महिनायताकै बढी हो ।
चीनमा अहिले १५ वटा प्रान्तमा कोरोना संक्रमण देखिएको छ । फेरि संक्रमण फैलिने डरले ठूलो परिमाणमा परीक्षण र कडा लकडाउन लागू गरिने बताइएको छ । मंगलबार मात्रै चीनमा ९० जनामा संक्रमण पुष्टि भएको राष्ट्रिय स्वास्थ्य आयोगले जनाएको छ ।
