एजेन्सी, २६ असोज । चीनले चिङ्दाओ सहरका सबै बासिन्दाकोे कोरोना परीक्षण गर्ने भएको छ । आइतबार १२ जनामा कोरोना भाइरसको संक्रमण पुष्टि भएपछि चिङ्दाओ शहरमा रहेका करिब ९० लाख नागरिकको कोरोना परीक्षण गर्ने चीनले निर्णय गरेको हो ।
चिनियाँ स्वास्थ्य अधिकारीहरुका अनुसार आगामी ५ दिन भित्र सहरका सबै बासिन्दाको कोरोना परीक्षण गरिने छ । राजधानी बेइजिङबाट ७ सय किलोमिटर दक्षिणपूर्वमा रहेको तटीय सहर चिङदाओको चिङ्दाओ चेस्ट हस्पिटलमा १२ जनालाई कोरोना पुष्टि भएपछि पूरै सहरमा परीक्षण गर्न लागिएको हो ।
चीनमा कोरोना परीक्षण निकै द्रुत गतिमा हुने गरेको छ । यसअघि चीनले गत मे महिनामा कोरोना भाइरसको उद्गमस्थल मानिएको हुबेई प्रान्तको राजधानी वुहान सहरका करिब १ करोड १० लाख नागरिकको कोरोना परीक्षण गरेको थियो ।
चीनमा कोरोना भाइरसको संक्रमण नियन्त्रण भइसकेको छ । पछिल्लो समय फाट्टफुट्ट रुपमा मात्रै चीनमा कोरोना संक्रमण पुष्टि हुने गरेको छ ।
