काठमाडौं । संयुक्त विद्यार्थी संगठनले पेट्रोलियम पदार्थमा भएको मूल्यवृद्धि तत्काल फिर्ता गर्न माग गरेकाे छ ।
बिहीबार नेपाल आयल निगमलाई ज्ञापनपत्र बुझाउँदै पाँच विद्यार्थी संगठनले कोरोना महामारी र लामो समयको बन्दाबन्दीको कारण जनताको जीवन कस्टकर बन्दै गएको अवस्था मूल्यवृद्धि हुनु आपत्तिजनक रहेको बताएको छ ।
ज्ञापनपत्रमा भनिएको छ, ‘जनतालाई राहत र सहुलियतको जरुरत रहेको अवस्थामा थप पिडा र आहत दिने यो मूल्यवृद्धि घोर जनविरोधी र घातक रहेको छ। ‘
नेपाल विद्यार्थी संघ, अखिल (क्रान्तिकारी), अनेरास्ववियु, समाजवादी विद्यार्थी युनियन र अखिल (छैटौँ) ले पेट्रोलियम पदार्थको मूल्यवृद्धि तत्काल फिर्ता नलिए कडा आन्दोलनमा उत्रिने चेतवानी समेत दिएको छ ।
निगमले मंगलबार खाना पकाउने एलपी ग्याससहित सबै इन्धनको मूल्य बृद्धि गरेको छ । जसअनुसार ग्यासको मूल्य प्रति सिलिन्डर २५ रुपैयाँ, पेट्रोलमा २ रुपैयाँ, डिजेल र मटितेलमा २/२ रुपैयाँ पुगेको छ ।
