काठामाडौँ। बागमती प्रदेशसभाका १४ जना एमाले सांसदहरूले संसदीय दल बोर्डले सोधेको स्पष्टीकरणको जवाफ बुझाएका छन् ।
जेठ ६ गते दलको ह्विप उल्लंघन गरेको भन्दै संसदीय दलका नेता एवम् बागमती प्रदेशका मुख्यमन्त्री डोरमणि पौडेलको अध्यक्षतामा बसेको बैठकले स्पष्टीकरण सोध्ने निर्णय गरेको थियो ।
२४ घण्टे समयसीमा दिएर सोधिएको स्पष्टीकरणको जवाफ १४ जना सांसदले एकै व्यहोराको बुझाएका छन् । स्पष्टीकरणको जवाफमा २०७८–०२–०६ मा भएको राष्ट्रिय सभाको सदस्यको लागि भएको उपनिर्वाचनमा कसले कसलाई मतदान ग¥यो भन्ने कुरा पूर्वानुमान गर्दै स्पष्टीकरण सोधिनु स्वयं गैरकानुनी र अलोकतान्त्रिक छ।
यस्तो प्रश्न नै पूर्वाग्रह र दुराशययुक्त रहेको उल्लेख गरिएको छ । साथै कुनै पनि मतदातालाई कुन उम्मेदवारको पक्षमा मतदान गरिएको हो भनी सोध्ने अधिकार कानुनले कसैलाई पनि नदिएको यस्तो प्रश्न आफैंमा अनुचित रहेको र अनुचित प्रश्न सोधेर अनुशासनविरोधी करार गर्न खोज्नु आफैंमा गलत कार्य रहेको उल्लेख छ ।
