काठमाडौं । नेपाल कम्युनिष्ट पार्टीका महासचिव नेत्रविक्रम चन्द ’विप्लव’ ले जनमतसंग्रहको माग गरेका छन् ।
संसद् विघटन र मध्यावधि निर्वाचन घोषणाबारे एक वक्तव्य जारी गर्दै विप्लवले संसदीय व्यवस्था जनताको चाहना र आवश्यकतासँग मेल नखाएकाले यो सफल नहुने आफूहरूको निस्कर्ष सही साबित भएको दाबी गरेका छन् ।
शनिबार एक विज्ञप्ति जारी गर्दै लगभग दुई तिहाइ मतसहित बनेको सरकार चल्न नसक्नु, असफल भएर मध्यावधि जानुपर्ने वाध्यता आउनु कुनै व्यक्ति, पार्टी र सरकारको मात्र समस्या नभएर संसदीय व्यवस्थाकै समस्या भएको विप्लवले वक्तव्यमा जिकिर गरेकाे छ ।
साथै, फेरि पनि संसदीय व्यवस्थाकै चुनाव घोषणा गर्नु समस्या समाधान गर्ने नभई देशलाई झन् ठूलो अन्तरविरोध सङ्कटमा धकेल्ने चालमात्र भएको तर्क विप्लवको छ । जारी संकटको निकास निर्विकल्प रूपले समाजवाद मात्र हुने र यो पार्टीको मत, जनताको माग र चाहनासँग जोडिएको विप्लवले उल्लेख गरेका छन् ।
संसद्वादी पार्टी, नेता र सरकार असफल भएकाले अब राज्यको संकटलाई उचित निकास दिने जिम्मा जनतालाई प्रदान गर्नुपर्ने तर्क गर्दै उहाँले जनतालाई नै अबको प्रणाली रोज्ने जिम्मा दिनुपर्ने माग गरका छन् ।
