काठमाडौं । प्रधानमन्त्री केपी शर्मा ओलीले जननेता मदन भण्डारीको योगदान अतुलनीय रहेको स्मरण गरेका छन् ।
२८ औँ मदन–आश्रित स्मृति दिवसका सन्दर्भमा सोमबार वक्तव्य जारी गर्दै प्रधानमन्त्री ओलीले दिवंगत नेता भण्डारी र आश्रितप्रति उच्च सम्मान व्यक्त गर्दै योगदान स्मरण गरेका छन् ।
भण्डारीका योगदानहरू दूरगामी महत्वका र अतुलनीय रहेको भन्दै प्रधानमन्त्रीले नेपाली समाजको ऐतिहासिक विकासक्रम र विशेषता, मार्क्सवादका आधारभूत सिद्धान्त र अन्तर्राष्ट्रिय कम्युनिष्ट आन्दोलनका अनुभवको गहन अध्ययन एवं समीक्षा गरी मदन भण्डारीले जनताको बहुदलीय जनवादको प्रतिपादन गरेको बताएका छन् ।
जबज आज नेपाली क्रान्तिको सिद्धान्तका रुपमा स्थापित भएको उल्लेख गर्दै प्रधानमन्त्री ओलीले यसले लोकतन्त्रलाई सामाजिक न्यायसँग जोड्न र नेपाली कम्युनिष्ट आन्दोलनलाई सही दिशामा अगाडि बढाउन मार्गदर्शन गरिरहेको उल्लेख गरेका छन् ।
साथै उहाँले नेपाल कम्युनिस्ट पार्टीलाई समृद्ध नेपाल, सुखी नेपालीको राष्ट्रिय आकांक्षाको च्याम्पियन बनाउने इमान्दार प्रयास सफल हुन नसकेको बताएका छन् ।
केही विभाजनकारी, अस्थिर र अवसरवादी सोचले लक्ष्य पूरा हुन नदिएको उहाँको धारणा छ । २८ वर्ष अगाडि जेठ ३ गते भएको दासढुङ्गा दुर्घटनामा मदन भण्डारी र जीवराज आश्रितको निधन भएको थियो ।
