बाँके, २२ चैत । बाँकेको नरैनापुर गाउँपालिका–४ खोदहवामा आगलागीका कारण ठुलो क्षति भएको छ ।
शनिबार लागेको आगलागीका कारण हालसम्म १ सय १५ घर पूर्णरुपमा जलेका छन् भने ३ जना घाइते भएका छन् । घाईतेको स्थानीय लक्ष्मणपुर अस्पतालमा उपचार भइरहेको छ ।
स्थानीय फकिर खाँको गोठबाट सुरु भएको आगलागी बस्तीभरि फैलिएको बताईएको छ । आगलागी नियन्त्रणका लागि नरैनापुर र नेपालगन्जका गरी दुईवटा दमकल प्रयोग गरिएको थियो ।
खोदवामा १ हजार २ सय ४८ घरधुरीको बसोबास रेहेको छ । अधिकांशका घर फुसका भएको कारण ठुलो क्षति हुन पुगेको वडा सचिव सुजिता चौधरीले बताएका छन् ।
यसअघि पनि नरैनापुर गाउँपालिका वडा नम्वर ६ को दोन्द्रागाउँमा आगलागी हुँदा केही घर जलेर नष्ट भएका थिए । फागुन २४ गते पनि नरैनापुर गाउँपालिका १ को सुइया गाउँमा भएको आगलागीमा २२ घर गोठ जलेर नष्ट भएका थिए । बाँकेको राप्तीपारीमा हरेक वर्षजसो आगलागीका घटना हुने गरेका छन् ।
