काठमाडौं, २१ माघ । गृहमन्त्री रामबहादुर थापाले राजनीतिक स्थायित्वको निम्ति संसदको विघटन गरिएको बताउनुभएको छ । बुधबार नेपाल कम्युनिष्ट पार्टी (नेकपा) केपी शर्मा ओली पक्षधर अखिल नेपाल ट्रेड युनियन महासंघको सातौँ राष्ट्रिय भेलालाई सम्बोधन गर्दै गृहमन्त्री थापाले देशमा राजनीतिक स्थायित्व कायम गर्नका निम्ति संसद विघटन गरिएको बताउनुभएको हो ।
कम्युनिष्ट पार्टीलाई एकताबद्ध गर्न जनतामा जाने निर्णय गरेको पनि उहाँको भनाई छ । जनतामा गएर मात्रै राजनीतिक स्थायित्व कायम गर्न सकिने उहाँले जिकिर गर्नुभयो ।
बिघटित संसद अस्थिरता जन्माउने संयन्त्रको रुपमा परिणत भएको उहाँको भनाई छ । बिघटित संसदले स्थायित्व दिन नसक्ने र त्यसको राजनीतिक औचित्य सिद्धिएका कारण संसदको विघटन गर्नुपर्ने आवश्यकता परेको उहाँले बताउनुभयो । बिघटित संसदको पुर्नस्थापनाले समस्याको हल नगर्ने उहाँको भनाई छ ।
पुरानो संसदले राजनीतिक अस्थिरता पैदा गर्ने भएकाले नयाँ संसदको गठनले मात्रै स्थायित्व कायम गर्नसक्ने उहाँले बताउनुभयो । संविधानले प्रधानमन्त्रीलाई संसद बिघटन गर्ने विशेषाधिकार दिएको भन्दै संसद विघटनको कदम संवैधानिक रहेको निष्कर्ष सरकारले निकालेको उहाँले बताउनुभयो ।
निर्वाचन आयोगले अध्यक्ष र महासचिव रहेको पार्टी नै वैधानिक पार्टी भनिसकेको गृहमन्त्री थापाले बताउनुभयो । सत्ता पक्ष र प्रतिपक्ष सबै चुनावमा होमिएको भन्दै उहाँले सर्वोच्च अदालतले पनि निर्वाचनकै पक्षमा फैसला गर्नेमा बिश्वस्त रहेको बताउनुभयो ।
