बुटवल, २६ पुष । बुटवलको राजमार्ग चौराहा चिडियाखोलासम्मका सडक किनारका संरचनामा सडिभिजन कार्यालयले डोजर चलाएको छ । सिद्धार्थ राजमार्ग अन्तर्गत सडक छेउका संरचना हटाउन यसअघि २४ घण्टे सुचना जारी भएको थियो । समायावधि पुरा भए लगत्तै डिभिजन सडक कार्यालयले डोजर चलाएर घरटहरा भत्काउन सुरु गरेको हो । आज बिहानै देखि ठूलो संख्यामा प्रहरी परिचालन गरी बुटवलको ट्राफिक चोकबाट सडक मिचेर बनाएका घर टहर भत्काइएका हुन् ।
उक्त सडक खण्डमा ३ सय १० घर र बाँकी ४७ खाली जग्गागरी ३ सय ५७ जनाले सडक सिमा मिचेकोमा २ सय जना भन्दा बढीले यस अघिनै घर भत्काई सडक खालि गरी दिएका छन । अतिक्रमित क्षेत्रको मध्यखण्ड बुटवलको ट्राफिक चोकमा रहेको दुर्गा मन्दिरको सटर र त्यस आसपासमा रहेका घरहरुमा डोजर चलाइएको छ । पटक पटक अदालतको आदेशले रोकिँदै आएको उक्त सडकको बिस्तारका बिरुद्ध नारायणी देवी प्रधान लगायतका २४ जनाबाट परेको पछिल्लो रिट निवेदनमा यस अघि गत असार ९ गते दिएको अल्पकालिन आन्तरिम आदेशलाई निरन्तरता दिन नपर्ने आदेश सर्बोच्च अदालतले गरेपछि डिभिजन सडक कार्यालय बुटवललाई सडक बिस्तार गर्ने बाटो खुलेको थियो ।
सर्वोच्च अदालतका न्यायधिस सपना प्रधान मल्ल र डा.मनोज कुमार शर्माको संयुक्त ईजलासले उक्त आदेशलाई निरन्तरता दिनु नपर्ने निर्णय गरेको हो । अदालतको त्यो आदेश दिए संगै बुटवल बेलहिया व्यापारीक मार्ग बिस्तार आयोजनाले सडक सीमा भित्रका घरटहर तथा त्यँहा बनेका संंरचना भत्काउने २४ घण्टे अल्टिमेटम दिएको थियो ।
सडक सीमा मिचेर निर्माण गरिएका घर टहर हटाउन पटक पटक सुचना गर्दा पनि स्थानीयबासी नमानेपछि बाध्य भएर डोजर चलाउनु परेको डिभिजन सडक कार्यालय बुटवलका प्रमुख जयलाल मरासिनीले बताउनुभयो । आयोजनाले सुचना जारी गरे संगै अधिकांस घरधनीहरुले शनिबार दिनभर लगाएर घर टहरा भत्काएका थिए ।
अदालतको आदेश अनुसार निवेदकहरुका कागजात अध्ययन गर्दा १ सय ५६ जना निवेदक मध्ये १ सय ५० जनाको मुआब्जाका लागि प्रमाण नपुगेको र ६ जनाको हकमा थप कागजात हेर्नु पर्ने भएकोले १५ दिन भित्र आयोजनामा सम्पर्क राख्न सूचना जारी गरेको भएपनि उनीहरुले आफ्नो प्रमाण पेश गर्न नसकेपछि सर्वोच्च अदालत पुगेका थिए ।
