एजेन्सी,१८ मंसिर। यूईएफए च्याम्पियन्स लिग फुटबलमा समूह ‘एच’को खेलमा इङ्ग्लिस क्लब म्यानचेस्टर युनाइटेड फ्रेन्स क्लब पेरिस सेन्ट जर्मेन पीएसजीसँग पराजित भएको छ ।ओल्ड ट्राफोर्ड स्टेडियममा बुधबार राति भएको खेलमा पेरिस सेन्ट जर्मेन पिएसजी ले म्यानचेस्टर युनाइटेडलाई उसकै मैदानमा ३–१ ले पराजित गरेको हो ।
पिएसजीका लागि नेइमारले दुई तथा मार्क्वीन्होसले एक गोल गरे । म्यानचेस्टर युनाइटेडका लागि मार्कश रासफोर्डले एक गोल गरेका हुन् । ७३ औँ मिनेटमा फ्रेड दोहोरो पहेँलो कार्ड पाएर मैदानबाट बाहिरिएपछि युनाइटेड १० खेलाडीमा सीमित भएको थियो ।
नेइमारले छैटौँ र इन्जुरी समयको पहिलो अर्थात ९१ औँ मिनेटमा गोल गरेका हुन् । मार्क्वीन्होसले ६९ औँ मिनेटमा गोल गरे । युनाइटेडका रासफोर्डले ३२ औँ मिनेटमा गोल गरेका थिए । पराजयपछि पनि युनाइटेड एक खेल बाँकी हुँदा ९ अंकसहित समूहको शीर्ष स्थानमा छ ।
जित निकालेको पिएसजी समान ९ अंकसहित समूहको दोस्रो स्थानमा रहेको छ । बुधबार राति नै भएको खेलमा स्थानबुल बासाक्सिहिरलाई ४–३ ले पराजित गरेको आरबी लेइप्जिग पनि ९ अंकसहित समूहको तेस्रो स्थानमा छ ।
