पाल्पा, १४ असोज । पाल्पा–बुटवल सडकखण्डअन्तर्गत सिद्धबाबा सडकखण्डमा पहिरो खसेपछि सडक अवरुद्ध भएको छ ।
शुक्रबार साँझ परेको अविरल वर्षाका कारण विद्युत् लाइन ड्याम नजिकै पहिरो खसेपछि गएरातिदेखि नै बाटो अवरुद्ध बनेको छ । बाटो अवरुद्ध हुँदा सयौँ यात्रु तथा सवारीसाधन बीच बाटोमै अलपत्र परेका छन् ।
सडक माथिबाट ठूलाठूला चट्टासहितको पहिरो खसेकाले उद्धारमा कठिनाइ भएको जनाइएको छ । गएरातिदेखि नै डोजर, स्काभेटर प्रयोग गरी पहिरो हटाउने कार्य भए पनि अहिलेसम्म सडक खुल्न सकेको छैन ।
