काठमाडौं, १३ साउन । नेपाली कांग्रेसका नेताहरुले राजधानीको बसन्तपुरमा सत्याग्रहमा बसेका ‘इनफ इज इनफ’ अभियानमा संलग्न युवाहरुको आन्दोलनमा ऐक्यवद्धता जनाएका छन् । कांग्रेस नेताहरुले मंगलबार बसन्तपुर पुगेर सरकारसंग भएका सम्झौता कार्यान्वयन गर्न माग राख्दै सत्याग्रहमा बसेका युवाहरुको अभियानमा समर्थन रहेको बताएका हुन ।
कांग्रेस नेता प्रकाशमान सिंहले कांग्रेसले संसद र पार्टीको केन्द्रीय समिति बैठकबाट समेत कोरोना नियन्त्रणका लागि सरकारले प्रभावकारी कदम चाल्नुपर्ने माग राख्दै आएको र अभियानमा संलग्न युवाहरुले स्वतन्त्र रुपमा उठाएका विषयहरु मेल खाएकाले पार्टीको समर्थन रहेको बताउनुभयो । त्यसैगरी नेपाल विद्यार्थी संघक पूर्व सभापति नैनसिंह महरले कुनै पनि समुदाय र वर्गबाट सरकारले गरेका गलत कामहरुको विरुद्धमा आवाज उठेमा त्यसको समर्थन कांग्रेसले गर्ने बताउनुभयो ।
त्यस अवसरमा कांग्रेस नेताहरु नवीन्द्रराज जोशी, रामहरी खतिवडा र काठमाडौं महानगरपालिकाकी उपमेयर हरिप्रभा खड्की लगायतको सहभागिता रहेको थियो । सतप्रतिशत पीसीआर परीक्षण हुनुपर्ने, क्वारेन्टिनको अवस्था सुधार गर्नुपर्ने लगायतका माग राख्दै आएका अभियन्ताहरुसँग सरकारले असार २३ गते लिखित प्रतिवद्धता जनाएको थियो । आफुहरुसँग गरेका प्रतिवद्धताहरु पुरा नभएपछि अभियन्ताहरुले सत्याग्रह सुरु गरेका हुन् ।
