काठमाडौं, ९ कात्तिक । तिहारको मौका छोपेर पटाकासहितका विस्फोटक पदार्थ र अवैध हातहतियारसहितका वस्तु राजधानी भित्रिन सक्ने भन्दै नाका चेकजाँचलाई प्रहरीले कडाइ गरेको छ । पटाकासहितका विस्फोटक पदार्थ ओसारपसारमा कडाइ गर्दै आएको प्रहरीले तिहारको मौका छोपेर हातहतियारसमेत ओसारपसार हुन सक्ने भन्दै राजधानी भित्रिने नाकामा तालिम प्राप्त कुकुरसहितको विशेष टोली खटाएको हो ।
महानगरीय प्रहरी परिसर काठमाडौंका प्रमुख एसएसपी उत्तमराज सुवेदीले राजधानी भित्रिने सबै नाकामा तालिमप्राप्त कुकुरसहितको विशेष टोली खटाइएको बताए । उनले तिहारलाई व्यवस्थित बनाउन प्रहरीले सर्वसाधारणमा जनचेतनामूलक कार्यक्रम र सुरक्षामा सावधानी दुवै अपनाएको बताए ।
यसैगरी, राजधानीको तिहार सुरक्षालाई ध्यान दिँदै काठमाडौं प्रहरीले बढी भीडभाड हुने स्थानमा सादा पोसाकमा समेत प्रहरी खटाइएको छ । यस्तै विभिन्न स्थानमा चेकप्वाइन्टसमेत स्थापना गरेको छ । यसैगरी, तत्कालै घटनास्थलमा पुग्न सक्नेगरी विशेष मोबाइल टोलीसमेत खटाएको परिसर काठमाडौंका प्रमुख सुवेदीले जानकारी दिए ।
यो खबर आजको राजधानी दैनिकमा प्रकाशित छ ।
