काठमाडौं, ६ मंसिर । सभामुख कृष्णबहादुर महराले सरकारलाई एउटै विषयमा छुट्टाछुट्टै निर्देशन नदिन संसदीय समितिहरुलाई सचेत गराएका छन् ।
प्रतिनिधिसभा अन्तरगतको १० वटै विषयगत समितिका सभापतिहरुलाई बिहीबार सिंहदरबारमा बोलाएर सभामुख महराले एउटै विषयमा सरकारलाई छुट्टाछुट्टै निर्देशन नदिन सचेत गराएका हुन् ।
त्यस अवसरमा उनले एउटै विषयमा सरकारलाई निर्देशन दिनु परे संयुक्त बैठक बस्न पनि संसदीय समितिहरुलाई आग्रह गरेका छन् । एउटै विषयमा समितिहरुले छुट्टाछुट्टै निर्देशन सरकारलाई दिनुपर्ने आवश्यक्ता नरहेको सभामुख महराको भनाई थियो ।
संघीय संसदको अधिवेशन छिट्टै बोलाउने तयारी
यसैबीच, संघीय संसदको अधिवेशन छिट्टै बोलाउने तयारी गरिएको छ । सभामुख महराले संसदको अधिवेशन तत्काल बोलाउने गरी सरकारसँग आवश्यक छलफल गर्न लागिएको जानकारी दिए ।
उनले संसदीय समितिका सभापतिहरुसँगको भेटमा संविधानसँग बाँझिएका सबै कानुन खारेज गरी नयाँ व्यवस्था गर्नुपर्ने भएकाले संसद बैठक बोलाउन ढिलाई नहुने योजना सार्वजनिक गरे ।
सभामुख महराले कानुन निर्माणको काममा केन्द्रित हुन पनि सांसदहरुलाई आह्वान गरे । त्यसैगरी संसदीय समितिहरुको कार्यालय व्यवस्थापन र जनशक्ति व्यवस्थापन गर्ने विषयमा पनि सभामुखले आफूहरुसँग छलफल गरेको संसदीय सुनुवाई विशेष समितिका सभापति लक्ष्मणलाल कर्णले जानकारी दिए ।
बैठकमा समितिका सभापतिहरुले आ–आफ्ना समितिको काम कार्वाही र त्यसमा देखिएका समस्याबारे सभामुख महरालाई जानकारी गराएका थिए । बैठकमा राष्ट्रियसभाका उपाध्यक्ष शशिकला दाहाल, संघीय संसद सचिवालयका महासचिव मनोहरप्रसाद भट्टराई लगायतका पदाधिकारी पनि सहभागी थिए ।
