एजेन्सी, ७ फागुन । स्पेनिस ला लिगामा रियल मड्रिड र रियल बेटिसको खेलमा गोलको वर्षा भएको छ । गएराति यी दुई टीमबीच भएको खेलमा ८ गोल भएको छ । आठ मध्ये पाँच गोल रियल मड्रिडले गरेको हो । रियल मड्रिडको जितमा मार्को असेन्सिओले दुई तथा सर्जिओ रामोस, क्रिष्टियानो रोनाल्डो र करिमा बेन्जेमाले एक एक गोल गरे ।

खेलको ११ औं मिनेटमा गोल गरेर अग्रता लिएपनि पहिलो हाफमा २–१ ले पछाडि परेको रियल मड्रिडले खेलको नतिजा आफ्नो पक्षमा पार्ने क्रममा दोस्रो हाफमा चार गोल गरेको थियो । रियल बेटिसलाई ५–३ ले पराजित गरेसँगै रियल मड्रिडको २३ खेलबाट ४५ अंक भएको छ ।
चौंथो स्थानमा रहेको रियल मड्रिड एक खेल बढी खेलेको शीर्ष स्थानको बार्सिलोनाभन्दा १७ अंकले पछाडि छ ।

ला लिगामा गएराति भएका अन्य खेलमा दोस्रो स्थानको एथ्लेटिको मड्रिडले एथ्लेटिक बिल्बाओलाई २–० तथा रियल सोसिडाडले लेभान्टेलाई ३–० ले पराजित गरेका छन् । एथ्लेटिक बिल्बाओलाई पराजित गरेसँगै एथ्लेटिको मड्रिडले २४ खेलबाट ५५ अंक जोडेको छ । छैटौं स्थानको भिल्लारियलले भने १६ औं स्थानको इस्पान्योलसँग १–१ गोलको बराबरी खेलेको छ ।