काठमाडौं । सन्दीप लामिछाने विदेश जान नपाउने भएका छन् । यूएईमा हुन लागेको लिग २ मा सहमागि हुन पाउनुपर्ने माग राख्दै सन्दीपले सर्वोच्चमा निवेदन दिएका थिए ।
उक्त निवेदनमाथि सुनुवाई गर्दै सर्वोच्चले सन्दीप लामिछानेलाई विदेश भ्रमणमा जाने अनुमति नदिएको हो । साथै सर्वोच्चले अर्को मुद्दालाई पनि साथमा राखेर आइतबार नै पेश गर्न आदेश दिएको छ ।
लामिछानेले बिहीवार सर्वोच्चमा दायर गरेको मुद्दाको पेसी न्यायाधीश ईश्वर खतिवडाको एकल इजलासमा परेको थियो ।
उच्च पाटन उच्च अदालतले सन्दीपलाई धरौटीमा छाड्ने फैसला गरेपछि सरकारी पक्षले सर्वोेच्चमा पुनरावेदन गरेको थियो । सन्दीपले पनि विदेश भ्रमणमा लगाइएको प्रतिबन्ध फुकुवा गर्न माग गर्दै हिजो सर्वोच्चमा निवेदन दिएका छन् । दुवै निवदेनलाई सँगै राखेर एकैपटक सुनुवाई हुनुुपर्ने सन्दीपका वकिलहरुको माग छ ।
नाबालिग बलात्कारको कसुरमा काठमाडौं जिल्ला अदालतमा मुद्दाको पुर्पक्ष गरिरहेको क्रिकेटर लामिछाने बिहीवार सर्वोच्च अदालत पुगेका थिए । धरौटीमा रिहा गर्ने उच्च अदालत पाटनको आदेशमा प्रतिवन्धात्मक व्यवस्था रहेकाले उक्त आदेशको प्रतिवन्धात्मक व्यवस्था हटाउन माग गर्दै लामिछानेले सर्वोच्चमा मुद्दा दायर गरेका हुन् ।
