एजेन्सी, ६ जेठ । दक्षिण सुडानका उपराष्ट्रपति रिक माशर र रक्षामन्त्री एजेलिना टेनीलाई कोरोना संक्रमण पुष्टि भएको छ । रक्षामन्त्री एजेलिना उपराष्ट्रपति माशरकी पत्नी हुन् ।
माशरको उमेर ६० वर्षभन्दा बढी छ । उनमा १३ मेमा कोरोना परीक्षण गरिएको थियो । कोभिड–१९ टास्क फोर्सका एक सदस्यलाई कोरोना संक्रमण देखिएपछि उपराष्ट्रपति माशरलाई पनि परीक्षण गर्दा कोरोना पुष्टि भएको हो ।
माशरका बडीगार्ड र केही सुरक्षाकर्मीहरुमा पनि कोरोना संक्रमण देखिएको छ ।
जोन्स हप्किन्स विश्वविद्यालयका अनुसार दक्षिण सुडानमा २ सय ९० जनामा कोरोना संक्रमण देखिएको छ भने ४ जनाको कोरोना संक्रमणकै कारण मृत्यु भएको छ ।
